Sakata La Umri Wa Miss Tanzania 2014, Sitti Mtemvu Lachukua Sura Mpya

Miss Tanzania 2014, Sitti Mtemvu.BAADA ya serikali kutoa siku saba za uchunguzi wa sakata la umri wa Miss Tanzania 2014, Sitti Mtemvu, maamuzi ya uchunguzi huo yameendelea kuwa katika hali ya sintofahamu baada ya kila upande kuonekana kutokuwa tayari kuweka wazi juu ya kinachoendelea. Wiki iliyopita, Naibu wa Wizara ya Habari, Vijana, Utamaduni na Michezo, Juma Nkamia, alisema kuwa wametoa siku saba kwa Baraza la Sanaa Tanzania (Basata) kufanya uchunguzi juu ya suala hilo lakini mpaka jana hakuna ripoti iliyokuwa imetolewa. 

Championi Ijumaa lilizungumza na Ofisa Habari wa Basata, Aristides Kwizela ambapo alisema uchunguzi wa suala hilo bado haujakamilika.“Ni kweli siku saba zimepita lakini bado uchunguzi haujakamilika, hatuwezi kusema utakamilika lini ila ufafanuzi utatolewa tu,” alisema Kwizela. 

Alipotafutwa Waziri Nkamia alisema kwa kifupi: “Nipo jimboni, bado sijajua kuhusu majibu ya uchunguzi huo, nafikiri ungewauliza Basata wanaweza kuwa na jibu sahihi.”Kumekuwa na madai kuwa Sitti alidanganya umri wake kuwa siyo miaka 23 bali ni 25, kitu ambacho ni kinyume na kanuni za shindano la Miss Tanzania ambapo mwisho wa umri kwa washiriki ni miaka 24.